關鍵一戰，鞍上人唔好再係韋達啦！

作者：楊庭輝

喺唔少老一輩馬迷心目中，韋達係一個好出色嘅騎師，但喺我心目中，佢極其量係一個好老師。毋容置疑，韋達平日有唔少出賽嘅片段都值得編入全球各大騎師學校嘅教材，佢講好多關於賽馬嘅嘢都值得參考，但咁多年嚟，佢幫香港贏過幾多場國際一級賽，熟識香港賽馬嘅朋友應該好清楚。

常言道：「天雨路滑，小心韋達！相信韋達，包冇發達！飛起韋達，好快發達！」如果用足球比賽打個比喻，你喺關鍵時刻搏到球十二碼，交畀韋達操刀，佢都可以同你跣一跣腳，然後將個波射咗去角球旗嗰邊。所以亦都可以話：「韋達猶如陳韋拿（嘗試模仿施丹射十二碼嗰位），關鍵時刻冇揸拿！」若然你話韋達可以同戴圖理相提並論，咁咪即係認同「韋拿踢法似我」嘅講法？

為咗回應外界對自己喺大賽「神隱」嘅批評，韋達大約喺 35+ 開始就年復年向外界發放「I’m still fit! I’m still competitive in big races!」嘅訊息。不過，事實勝於雄辯！雖然唔少馬圈中人對住傳媒都係盛讚韋達，但佢喺大賽交啲咁嘅表現，你好難怪練馬師同馬主唔將「精英大師」、「牛精福星」、「爪皇凌雨」、「爆冷」、「好爸爸」、「蓮華生輝」、「軍事出撃」、「步步友」、「威爾頓」等等嘅馬王佳駟交畀佢騎。

簡單嚟講，十三少好多時去到大賽場合就變得患得患失，同埋佢喺真正要搏殺嘅時候太錫身啦！佢咁樣騎馬的確好少畀人 DQ，同埋可以保平安，但如果係面對「狹路相逢勇者勝」嘅局面，十三少好多時畀人夾兩夾就收得檔。可以話，佢就係香港賽馬界嘅「Over My Dead Body」！

總而言之，韋達策騎生涯最光輝嘅歲月喺 97、98 年嗰陣，但佢之後嘅板斧已經見盡，就算贏到幾場大賽都係因為匹馬本身超級，係得「極品絲綢」同「陽明飛飛」贏打吡同「喜蓮巨星」贏冠軍暨遮打盃可以歸功畀佢嘅臨場發揮。關鍵一戰，鞍上人係韋達就好難畀到人信心。相比起喺前線衝鋒陷陣，韋達真正擅長嘅係公關工作，以及係晨操調教馬匹嘅韁口。佢轉型做練馬師之後，運用自己嘅人脈同經驗幫本土年輕騎師成長，唔再係前線賣港派膠，咁咪幾好囉！

全文原載於《立場新聞》2020年7月18日。